主页 > V超生活 >【18区扫食】荃湾商场扫区2.0 平价鳗鱼饭+$10三球雪糕 >

【18区扫食】荃湾商场扫区2.0 平价鳗鱼饭+$10三球雪糕

2020-06-11

荃湾真係一个人杰地灵嘅好地方，各式餐厅比比皆是，人地谂唔到食乜係因为无得拣，荃湾人谂唔到食乜係因为太多好野唔知点拣！所以净係扫一次边扫得晒啊，今次再带大家翻兜荃湾，去到昌宁同昌安呢两个商场，嚟个荃湾美食第二弹！

撰文、摄影: 很想很想食玩训

Zakka风文青咖啡店歎All Day Breakfast

估唔到旧式商场都有间咁文青feel 嘅Café，位置隐蔽，旺中带静，夹住喺美甲舖中间，唔细心留意就会错过！店内以木家俱为主，食物选择写咗喺手绘黑板上，仲有好多小物装饰，好Zakka风。环境靓之余食物都好有水準，啱晒文青打卡，喺度食返个All Day Breakfast，感觉好写意啊！

法兰西吐司餐＄68 西多上面有个糖霜太阳，睇见就开心。食落外层鬆脆内层柔软，中间果酱微微酸甜，令成件事无咁Heavy，唔会食到成口油。炒蛋半生熟，口感软滑，想浓味啲啲，可加黑椒、盐同胡椒，増添香味。连肠仔都有刻简单花纹，好有诚意。薯角炸得金香脆口，烟肉不会太鹹，不过略嫌有少少乾。整体几高分！

橙与鸭批Pizza＄65 见到呢个咁骑呢嘅配搭，心谂边会有人想食？但係佢再一次证明凡事唔係绝对嘅！烟鸭胸味道浓得嚟唔会太鹹，焗完都仲好juicy。香橙嘅酸味啱啱好，平衡咗其他重口味嘅材料。另外裏面仲有芝士，提子乾同橙皮丝，连埋随碟附上嘅罗勒叶食更香。咁新奇好味，点都要试下！

芝士拉到少少丝

香蕉朱古力蜂蜜pancake铁塔三层高嘅 Pancake 塔，净係卖相已经令小编有幸福嘅感觉！每层都有好多好多Cream同好多好多香蕉，好好味！Pancake虽然薄薄哋，但睇落软绵绵，瞄準中间狠狠切落去，令每块Pancake都有雪糕包围食落仲爽！上面仲有杏仁碎，核桃碎同脆米，令口感更丰富。

黑牛特饮＄38 除咗平时嘅可乐同朱古力雪糕外，呢间店嘅黑牛仲加左Cream同可可脆粒，令到成杯饮品更有层次。朱古力雪糕味道浓郁，但将所有嘢Mix埋之后，可乐的酸味反而太出。

冻抹茶牛奶＄32（跟餐加＄14）抹茶味浓，但奶味更浓，味道微甜，加咗Cream之后口感更Rich。搅匀咗先再饮味道更好。

【18区扫食】荃湾商场扫区2.0 平价鳗鱼饭+$10三球雪糕

小灶子

地址：荃湾西楼脚路202-216号荃昌中心昌宁商场一楼6号舖(显示地图)

营业时间：星期一12pm-9:30pm, 星期六日及公众假期10am-9:30pm, 星期二休息

电话：6732 6515

荃湾街坊推介煎蛋吉列猪+鳗鱼饭烧汁任加

由日本人主理嘅和式料理快餐店，午市晚市一样爆场。话明係快餐，所以上菜速度够嗮快，眨下眼就有得食，啱晒小编呢啲心急人！如果识日文仲可同老闆吹下水（其实老闆都识讲广东话）！茶记feel嘅日本野感觉好新鲜。呢度食物价钱十分亲民，性价比高，吸引咗唔少学生哥捧场。

吉列猪扒冷荞麦麵+煎蛋＄33(煎蛋＋＄2) 猪扒几香脆，煎蛋就係太阳蛋嚟，蛋黄配上猪扒口感不错。冷荞麦麵配另上嘅冷麵汁味道不俗，只卖＄33，抵食!

腩肉+九州猪骨拉麵 $35 唔好畀佢平凡外表呃到，腩肉非常好味，腍到入口即化！而且肥而不腻，块猪皮仲好重胶质！连小编减紧肥都忍唔住食咗两块，返去又要跑返几公里还债。

猪腩肉万岁！

鳗鱼饭＄58 蒲烧鳗鱼差唔多有成只手掌咁大块，仲有浓浓烧鳗汁无限任加，引死人喇！鳗鱼控嘅心灵又被触动了。鳗鱼烧得好嫩滑，珍珠米软得嚟粒粒散开，几有咬口，好好味！

任落唔嬲!

照烧鸡排＄20 外皮搽酱油烧到卜卜脆！鹹鹹甜甜带点焦香，超正！鸡扒嫩滑又多汁，无得输！认真，鸡皮係灵魂，一定要连皮食！

好大块!

【18区扫食】荃湾商场扫区2.0 平价鳗鱼饭+$10三球雪糕

和食快餐

地址：荃湾西楼角路188号荃昌中心昌宁商场地下23号舖(显示地图)

营业时间： 11am~9:30pm

电话：2413 0678

怀旧办馆 10蚊3球低脂雪糕

估唔到荃湾仲有呢类旧式办馆。裏面有卖廿几款口味嘅雪糕同粒粒糯米糍，价钱都返到廿几年前咁，雪糕10蚊就有3球!亦有卖怀旧零食、明星精品、贴纸同卡通填色簿。连怀旧腌製凉果，如九製陈皮、柠檬、相思梅都有，好vintage。以前细个总有一间喺咗近，宜家真係买少见少喇。

有成20几款雪糕~

超抵食!!!$15有5球~$10有3球，学生仲要减$1!!!

低脂雪糕＄10三球，番薯＋豆腐＋蓝珠果（蓝珠果＋＄1）豆腐雪糕味道好真实，好似食紧真豆腐咁浓味。番薯雪糕微甜，但好香番薯味。蓝珠果雪糕其实即係蓝莓雪糕，裏面有蓝莓果肉，食落有啲似蓝莓味吹波糖。$10三球抵到无朋友。

彩针可以自己落

迷你三层糯米糍＄10（5粒）

【18区扫食】荃湾商场扫区2.0 平价鳗鱼饭+$10三球雪糕

朱古力雪糕糯米糍外皮柔软烟韧，朱古力馅好滑溜啊！

绿茶雪糕糯米糍外皮相对较厚，不过绿茶味几重，中间係红豆馅。

云呢嗱雪糕糯米糍，裏面係士多啤梨果酱馅，雪冻咗有少少沙冰嘅口感。

各款凉果~

仲有啲好耐无见过嘅零食~

旧式杂货零食店少不了有偶像精品卖~

仲有卡通贴纸簿~填色簿~

【18区扫食】荃湾商场扫区2.0 平价鳗鱼饭+$10三球雪糕

蜜糖星星

地址：荃湾西楼脚路202-216号荃昌中心昌宁商场一楼24号B舖(显示地图)

营业时间： 2pm-9pm

电话：3580 0229

饮靓啡食好Cake

呢间Café装修精緻，设有露天茶座，悠闲舒适，感觉好relax！Lunch hour过嚟歇一歇，放鬆下都唔错。每日仲提供好多自家製蛋糕，任君选择。客人每买一杯咖啡可以储一个印花，储满十个可以换一杯＄25或以嘅下饮品，惊自己大头虾唔见印花卡？可以将印花卡寄存係Café，下次要用先搵返出嚟，好窝心啊！餐厅仲会不时举办咖啡工作坊，推广咖啡文化，如拿铁拉花工作坊及咖啡烘培工作坊等。店内亦有售自家烘培嘅咖啡旅行装，无时间参加工作坊，都可以买包嚟试下。

吞拿鱼沙律蛋配多士$30 摆设十分吸引，多士香草味好浓，沙律就有橄榄油同醋调味，味道不错。咁丰富都只係＄30炸!!好啱下午茶叹番下。

玫瑰焦糖窝夫$52 窝夫上面有云呢嗱雪糕同玫瑰乾花瓣，窝夫连花瓣一齐食，会有少少花香Mix落蛋味度，感觉几得意。云呢嗱雪糕好Smooth，奶味同云呢嗱味一样咁浓，窝夫夹埋雪糕食，唔会太甜。

豆腐桂花蛋糕＄28 面层係透明桂花啫喱，下层係豆腐芝士。一食落口最出係芝士味，然后会食到少少桂花香，到最后食完个口会有阵浓浓嘅豆腐味。口味好清新，成件食晒都唔觉腻！饼底唔会太油太实，同样值得一讚。

红桑子益力多芝士蛋糕＄28 成个Cake 係慕斯蛋糕质地，一拎埋嚟震腾腾，好QQ。红桑子上层酸酸甜甜，食落好有空气感，入口即化；下层Cheese底浓密幼滑，好Smooth。上层酸甜，下层香滑，Match得嚟够清新，隐约食到轻轻嘅益力多乳酸味。

朱古力流心鬆饼＄35 虽则个样似心太软，其实佢係鬆饼。鬆饼少少流心，不过裏面嘅朱古力就未完全焗溶，鬆饼质地鬆散，食落有好多一粒粒喺口裏面，口感有待改善，麻麻哋。

焦糖鲜奶咖啡＄28 见到个靓靓拉花就笑咗出嚟，鲜奶打得好滑，奶味好重，虽然加咗焦糖浆，但都饮到咖啡的微苦，分量控制得几好。

荔枝桂圆红枣茶＄28 味道清甜，一入口先有荔枝味，然后桂圆味先慢慢渗出嚟，配cheese cake可以解腻。建议浸一阵先饮会更香，感觉养生。

【18区扫食】荃湾商场扫区2.0 平价鳗鱼饭+$10三球雪糕

咖啡赏馆

地址：荃湾西楼脚路188号荃昌中心昌宁商场地下66A舖(显示地图)

营业时间： 11am-11pm

电话：6821 0145

完全唔Dry素食店

年轻一辈，可能觉得食素剩係得健康嘅菜菜菜，无肉落肚好Dry，但今时今日食素都可以好惹味香口。呢间素食店提供多款素食小食俾客人选择，其中不乏煎炸烹调的脆口料理。每日更有不加味精的老火靓汤。食肉兽不妨搵日转转口味！提提大家店舖逢星期日休息，不过如果星期日撞正农曆初一或十五就照常营业，改为星期六休息，唔好摸门钉啦!